ՀՊՉ ՈՒԹ ՀԻՄՆԱՐԱՐ ԿԱՐՈՂՈՒՆԱԿՈՒԹՅՈՒՆՆԵՐ

Ուսումնական առարկաների վրա հիմնված կրթակարգերում սահմանվում են այն գիտելիքները, կարողությունները և արժեքները, որոնք պետք է սովորողը ձեռք բերի առարկայի ուսումնասիրության արդյունքում: Կարողունակությունների վրա հիմնված մոտեցման դեպքում առարկաները դիտվում են որպես գործիք առավել ընդհանրական որակներ ձևավորելու համար: Ընդ որում, որպես կանոն, այդ որակներից (կարողունակություններից) յուրաքանչյուրը ձևավորվում է մի քանի առարկաների ուսումնասիրության արդյունքում:

Կարողունակությունների վրա հիմնված մոտեցման դեպքում ուսումնական գործընթացը կազմակերպվում է այնպես, որ հնարավորինս նպաստի սովորողի այն գիտելիքների, հմտությունների, դիրքորոշման և արժեքների ձևավորմանը, որոնց սովորողը առնչվում է իր առօրյա և ուսումնական գործունեությունը կազմակերպելիս:  

Այս մոտեցումն առավել բարձր պահանջներ է առաջադրում դասավանդողներին, քան թեմատիկ ուսուցման դեպքում է:

Այս մոտեցման դեպքում, կրթության բովանդակությունը ձևավորվում է կարողունակությունների հենքի վրա, այլ ոչ թե առանձին առարկաների: Հաջողությունը պայմանավորված է կարողունակությունների, այլ ոչ թե առանձին առարկաների յուրացմամբ: 
Կարողունակությունների վրա հիմնված կրթական համակարգերը կարևորում են այն, որ սովորողները կարողանան կիրառել ձեռք բերված գիտելիքները և հմտությունները նոր համատեքստերում, կարողանան հմտորեն լուծել առաջացող խնդիրները։